Finfinnee, Tajaajilli Kominikeeshinii Federaalaa ibsa har’a baaseen mootummaan Federaalaa waraana naannoo Tigraay jiru dhaabuu beeksise. “Lubbuu lammiilee haala yaaddessaa keessa jiran baraaruu fi dararaa lammilee hir’isuuf tarkaanfiiwwan adda addaa fudhachuun barbaachisaa waan ta’eef, mootummaan deeggarsa namoomaaf jecha walitti bu’iinsa dhaabuu murteessee jira” jedhe ibsichi
Yeroo ammaa jiraattonni naannoo Tigraay kumaatamaan lakkaa’aman gargaarsa namoomaa barbaacha gara naannolee ollaatti baqataa jiru. Lammiileen naannolee ollaa Tigraayi jiraatanis lammilee naannoo Tigraayi irraa baqatan miira obbolummaa fi tokkummaatin simachuun hariiroo gaarii uummattoota gidduu jiru hojiin kan mul’isu ta’us bakkuma jiranitti gargaarsi akka dhaqqabu mootummaan hojjachuu qaba jedhame.
Haaluma kanaan tumsii fi deeggarsa hawaasa idil addunyaatiin taasifamu akka cimuuf mootummaan waamicha dhiyeessuu eere ibsichi. Dhiyeessiin gargaarsa namoomaa ummata deeggarsa barbaadaniif karaa fooyya’aa ta’een akka qaqqabuuf qaamolee dhimmichi ilaallatu waliin hojjechuuf kutannoo qabaachuu isaa irra deebiin mirkaneessas jedhe.
Dhaabbanni Mootummoota Gamtoomanii lakkoofsa balallii xiyyaaraa gargaarsa namoomaa taasisan akka dabaluu fi sirni dhiyeessii boba’aa fi mallaqaa dhaabbilee gargaarsaa akka dabaluu taasifameera jedha ibsichi.
Dhumarrattis ibsichi murtoo walitti bu’iinsa deeggarsa namoomaaf akka dhaabbatu mootummaan murtaa’e bu’aa barbaachisu akka argamsiisuuf , gareen hidhattootaa naannoo Tigraay keessa jiran jeequmsa gosa kamiiyyuu irraa akka of qusatanii fi iddoowwan naannoolee ollaa humnaan qabatan akka gadhiisanii bahan waamicha dhiyeesse. AS